Í kvöld 4. nóvember mun Stíll fara fram í Félagsmiðstöðinni Setrinu Setbergsskóla. Stíll er keppni á milli félagsmiðstöðva þar sem keppt er í hárgreiðslu, förðun og fatahönnun út frá ákveðnu þema. Þemað þetta árið er ,,Ævintýri" og eru sérstakar reglur sem þátttakendur þurfa að fara eftir. Sigurvegarar taka svo þátt í landskepninni þar sem þátttakendur koma frá öllum landshlutum.

Aðgangseyrir er kr. 300.  Húsið verður opnað kl. 19.30.

Markmið Stíls eru að hvetja unglinga til listsköpunar og um leið gefa þeim aukin tækifæri til frumlegrar hugsunar og sköpunarhæfileika. Vekja jákvæða athygli á því hvað unglingar eru að gera á sviði sköpunar og gefa þeim kost á að koma sínum hugmyndum á framfæri utan félagsmiðstöðvanna. Að unglingarnir komist í kynni við fleiri sem hafa áhuga á sama sviði.

Nú hafa allar félagsmiðstöðvar á vegum ÍTH verið opnaðar með glæsibrag. Vel var mætt á alla staði og stemningin frábær. Boðið var upp á grillaðar pylsur í frábæru veðri og síðan tekið óspart við að nýta sér þá aðstöðu og umgjörð sem félagsmiðstöðvarnar bjóða upp á. Það vakti athygli að tilþrifin í borðtennis höfðu ekkert gefið eftir þrátt fyrir langt sumarfrí og ljóst að við eigum hér í Hafnarfirði hæfileikarík ungmenni á öllum sviðum. Félagsmiðstöðvarnar verða svo opnar á mánudags-, miðvikudags- og föstudagskvöldum í vetur frá kl. 19.00 – 20.00, miðdeildarstarf er á mánudögum frá kl. 17.00 – 19.00 og ýmiskonar hópa- og klúbbastarf á miðvikudögum og föstudögum frá kl. 17.00 – 19.00. Þá verður staðið fyrir ýmsum stærri viðburðum s.s. hæfileikakeppni, grunnskólahátíð, böllum ýmiskonar, leikskýningum, íþróttadegi og margt fleira. Starfsfólk ÍTH fagnar opnun félagsmiðstöðva og býður alla velkkomna í starfið.

Skráning er hafin í heilsdagsskóla/frístundaheimili og fara fram eftirfarandi:

Hraunvallaskóli: Umsókn fer fram á skrifstofu skólans eða senda hana á lindah@hraunvallaskoli.is

Lækjarskóli: Umsókn fer fram á skrifstofu skólans.

Engidalsskóli: Umsókn fer fram á skrifstofu skólans.

Áslandsskóli: Skráning fer fram á skólasetningu.  Starfsfólk verður staðsett í heilsdagsskóla og tekur við skráningum.

Sótt eru um vistun í gegnum Íbúagátt Hafnarfjarðar fyrir
Hvaleyrarskóla, Öldutúnsskóla, Setbergsskóla og Víðistaðaskóla. Ef upp koma vandamál varðandi skráningu í íbúagáttinni leitið aðstoðar þjónustuvers Hafnarfjarðar í síma 585-5500
Ath. að þeir sem þegar hafa skráð börn sín í frístundaheimili/heildagsskóla í vetur þurfa ekki að skrá aftur.

Nánari upplýsingar má nálgast á skrifstofu æskulýðsmála í síma 585-5750 eða senda fyrirspurn á ith@hafnarfjordur.is.  Sjá einnig hér á síðunni undir Heilsdagsskólar/frístundaheimili hér til hliðar.

Drullukökukeppni Skólagarða Hafnarfjarðar var haldin 6. júlí í blíðskaparveðri. Um 80 krakkar tóku þátt í keppninni og voru „bakaðar“ margar flottar drullukökur. Dómnefndin var skipuð tveim starfsmönnum Vinnuskólans sem fóru á milli skólagarðanna fjögurra og veittu verðlaun fyrir þrjár flottustu drullukökurnar í hverjum garði fyrir sig. Dómaranna beið erfitt starf, þar sem allar kökurnar voru rosalega flottar, en þeir höfðu unnið að stöðlum til þess að fara eftir sem auðvelduðu þeim verkið. Þá var aðallega dæmt eftir frumleika og stílbrigði en jafnframt var hugað að hugmyndinni að baki kökunni og frágangi.

Hið árlega Hafnarfjarðarmeistaramót í dorgveiði fór fram þriðjudaginn 21. júní síðastliðinn í blíðskaparveðri. Keppnin fór fram við Flensborgarbryggju en hún hefur verið haldin á hverju sumri í yfir 20 ár. Gríðarlega góð þátttaka var í ár en um eða yfir 400 börn á aldrinum 6-12 ára létu reyna á veiðihæfileika sína með veiðarfærin. Þátttakendur komu frá öllum íþrótta- og leikjanámskeiðum ÍTH en auk þeirra komu t.d. hópar frá námskeiðum FH og Hauka auk annarra gesta. Að sögn skipuleggjenda hefur keppnin sjaldan eða aldrei verið jafn vel heppnuð og skemmtu þátttakendur sér konunglega. Allir helstu fjölmiðlar landsins létu sjá sig, mynduðu keppnina og tóku viðtöl við krakkana. 

Veitt voru þrenn verðlaun í keppninni. Ísak Þór úr leikjanámskeiðinu Áslandsskóla fékk verðlaun fyrir þyngsta fiskinn, Benedikt Bessi fékk verðlaun fyrir flesta fiska og Brynjar Dagur frá leikjanámskeiði Hauka fyrir þann furðulegasta.